اسکولز کھولنے کی تیاریاں مکمل، طلبا کیلئے ایس او پیز جاری کردیئے گئے

لاہور(نیوز ڈیسک)محکمہ صحت نے پنجاب نے 15ستمبر سے سکول کھولنے کیلئے ایس اوپیز جاری کردیے، جس کے تحت سکولوں میں ان ڈور گیمز، جھولے ، اور کھیلوں کی سرگرمیو ں ،تقریری مقابلوں، مارننگ اسمبلی پر پابندی ہوگی ، ماسک پہننا لازمی اورہاتھ ملانے پر پابندی ہوگی، یومیہ بنیاد پر بچوں کا ٹمپریچر چیک کیا جائے گا،جبکہ طالب علم اپنا دوپہر کا کھانا گھروں سے لائیں گے۔تفصیلات کے مطابق پنجاب میں 15ستمبر سے تعلیمی ادارے کھولنے کی تجویز زیر غور ہے، اس سے حوالے محکمہ صحت نے ایس اوپیز تیار کرلیے ہیں، محکمہ پرائمری اینڈ سیکنڈری ہیلتھ کیئر نے سکول کھولنے کیلئے ایس اوپیز

کا نوٹیفکیشن جاری کردیا ہے۔ ایس اوپیز کے تحت سکولوں میں ان ڈور گیمز، جھولے ، اور کھیلوں کی سرگرمیو ں پر پابندی ہوگی۔سیمینارز، تقریری مقابلے اور ٹورنامنٹ کے انعقاد کی پابندی ہوگی۔سکولوں میں مارننگ اسمبلی منعقد کروانے پر پابندی عائد ہوگی جبکہ سکولوں میں ماسک پہننا لازمی ہوگا۔ سکولوں کی انتظامیہ کیلئے ضروری ہوگا کہ سکولوں میں صابن اور ہینڈ سینیٹائزر کی دستیابی یقینی بنائی جائے۔ اسی طرح سانس کی تکلیف میں مبتلا طلباء ، سٹاف کو گھر تک محدود رکھا جائے گا۔ تعلیمی اداروں کو روزانہ کی بنیاد پر ڈس انفیکٹ کیا جائے گا۔تعلیمی اداروں اور سکولو ں میں احتیاطی تدابیر کے تحت 6 فٹ کا فاصلہ رکھنا لازمی ہوگا جبکہ طالب علموں کے ہاتھ ملانے پر پابندی عائد ہوگی۔ تعلیمی اداروں میں روزانہ کی بنیاد پر بچوں کا ٹمپریچر چیک کیا جائے گا۔طالب علم اپنا دوپہر کا کھانا گھروں سے لائیں گے۔ واضح رہے پنجاب میں کورونا کا زور ٹوٹ گیا ہے، جس کے ساتھ کاروباری اور دیگر شعبہ ہائے زندگی کی سرگرمیاں شروع ہوگئی ہیں۔گزشتہ روز وزیراعلیٰ پنجاب عثمان بزدار نے اپنے ٹویٹ میں کہا تھا کہ عید الاضحٰی کے بعد 20 دن میں ہم نے مختلف شعبہ زندگی سے تعلق رکھنے والے تقریباً 60 ہزار افراد کی رینڈم سیمپلنگ کی ہے۔ الحمد للہ ان میں سے صرف 95 لوگوں کے کورونا مثبت نتائج آئے ہیں جو کہ 0.16 فیصد بنتا ہے۔ انہوں نے کہا کہ اس صورتحال میں ہمیں احتیاطی تدابیر جاری رکھنی چاہیں تاکہ وائرس کا پھیلاؤ دوبارہ زیادہ نہ ہو۔